" ******* කියල කෙනෙක් මෙහේ ඉන්නවද?"
"ඔව්! ඒ මම තමයි. මොකක්ද වුවමනාව?" තම නිවසට පැමිණි තරුණයන් දෙදෙනාගෙන් කලණි නැවත ප්‍රශ්න කලාය.
"ආ! මිස්, අපේ කොම්පැනියෙන් පුටු හයක් ගත්තනේ. ඒ බිලට ඇදපු ලොතරැයියෙන් ෆ්‍රිජ් එකක් ඇදිලා තියෙනවා. අපි ඒක දැනුම් දෙන්නයි ආවේ."
"අනේ කොච්චර එකක්ද, අපිනම් හීනෙකින්වත් හිතුවේ නෑ මෙහෙම දිනුමක් ලැබෙයි කියලා."
"ඔව්, ඔව්, මිස් හරිම වාසනාවන්තයි. මේ තෑග්ග දෙන්න මිස් එදා බඩු ගත්තු බිල දෙන්න පුළුවන්ද?"
"අනේ ඒ බඩු අරගෙන දැන් අවුරුද්දකටත් වැඩියි නේ. බිලනම් හොයා ගන්න නැහැ."
"ආ! දැන් මොකද කරන්නේ. බිල නැතිනම් ඉතින් තෑග්ග දෙන්නත් විදියක් නෑ. කමක් නෑ. කමක් නෑ. අපි කොම්පියුටරෙන් බිලක් හදලවත් දාමු. ඒ වුනාට බිල දෙන්න රු.9000 ක් ඕන කරනවා." තරුණයෙක් පැවසීය.
මේ වන විට වත්තේ කිසියම් වැඩක යෙදී සිටි කලණිගේ ස්වාමාපුරුෂයා එතනට පැමිණියෙන් ඇය ඔහුට සියලු විස්තර පැවසුවාය.
"ඕකනේ කියන්නේ, බඩුවක් ගත්තම බිලක්වත් පරිස්සම් කර ගන්නෙ නෑ. බිල හදන්න රු.9000 ක් දුන්නට කමක් නෑ. තෑග්ග ඒ වගේ හතර පස් ගුණයක් වටිනවානේ." සැමියාද ඔහුගේ කැමැත්ත පළ කළේය. ඒ අනුව කලණි රු. 9000 ක මුදල් වහාම තරුණයන් දෙදෙනාට දුන්නේ තෑග්ග ලබා ගැනීමේ මහත් බලාපොරොත්තු ඇතිවය.
"හොඳයි අපි හෙට උදේ එහෙනම් ෆ්‍රිජ් එක ගෙනත් දෙන්නම්. හැබැයි ඒක බා ගන්න කවුරු හරි දෙතුන් දෙනෙක් කතා කරගෙන ඉන්න." යැයි පැවසූ ඔවුහු, අවශ්‍ය වුණොත් කතා කරන්න යි කියා දුරකථන අංකයක්ද දී පිටව ගියහ.
කලණි සහ ඇගේ සැමියා තවත් නෑදෑයන් දෙදෙනෙකුද කැඳවාගෙන තමන්ට ලැබුණු ශීතකරණය ගෙනෙන තුරු මග බලා සිටියහ.
දවස ගෙවී ගියද තරුණයන් දෙදෙනා පැවසූ ෆ්‍රිජ් එකනම් ලබුනේ නැත. අන්තිමේදී තරුණයන් දුන් දුරකථන අංකයට කතා කර තොරතුරු දැන ගැනීමට උත්සාහ කළ ද එය භාවිතයේ නොමැති අංකයක් බව කියැවිණි
තෑග්ගක් ඇති බව පවසා රු. 9000 ක මුදලක් වංචා කර ඇති බවට ඔවුහු අවසානයේ පොලිසියට පැමිණිලි කළහ. සිද්ධිය සම්බන්ධව තිහගොඩ පොලීසිය වැඩිදුර පරීක්ෂණ පවත්වයි.මිතුරන් සමඟ බෙදාගන්න.
