අමිෂා කාවින්දී තරුණ රංගන ශිල්පිනියක්‌. අමිෂා පාසල් කාලයේ පටන් පෙන් වූ නර්තන දක්‌ෂතාවය නිසාම ඇයට චිත්‍රපට ලෝකයට සම්බන්ධවීමට වාසනාව උදා වුණා. මුලින්ම චිත්‍රපට දෙකක පමණ පසුබිම් නර්තන ශිල්පිනියක්‌ ලෙස කටයුතු කළ අමිෂාට "සඳ දෙව් දෝණි" චිත්‍රපටයේ ප්‍රධාන චරිතය රඟපාන්ට ආරාධනා ලැබුණා. එදා පටන් මේ දක්‌වාම ටෙලි නාට්‍යවල රංගනයට වඩා චිත්‍රපට රංගනයට ප්‍රමුඛතාවය ලබාදෙන්නට ඇයට හැකියාව ලැබුණා.අමිෂා කොහොමද?
හොඳයි......... හොඳින් ඉන්නවා.
අමිෂා මේ දවස්‌වල මොනවද කරන්නේ.....
මේ දවස්‌වල ගෙදරට වෙලා විවේක සුවයෙන් ඉන්නවා. "විහඟ ලඳුන්" චිත්‍රපටයේ ෂූටිං ඉවර වුණා. චිත්‍රපටය නිෂ්පාදනය කරන්නේ තුෂාර සම්පත්.
තිරගත වෙන්නට නියමිත චිත්‍රපට තියෙනවාද?
කිහිපයක්‌ම තියෙනවා. මගේ පළමු චිත්‍රපටය "සඳ දෙව් දෝණි" තවම තිරගත වුණේ නැහැ. ඒක මම රඟපෑවේ 2005 වසරේදී. මේ අවුරුද්දේ තිරගත වෙනවා කියලා ආරංචියක්‌ තියෙනවා. මම දෙවෙනියාට කළ "සදා කල් ඔබ මගේ" චිත්‍රපටයත් තිරගත වෙන්නට නියමිතය. "විහඟ ලඳුන්" චිත්‍රපටයේ වැඩ ඉවරයි.
අමිෂා රංගනයට යොමු වුණේ කොහොමද?
පාසලේදී මම විෂයක්‌ වශයෙන් නර්තනය ප්‍රගුණ කළා. බාහිරවත් මම නර්තනය ඉගෙන ගත්තා. ඒ නිසාම පාසල් යන කාලෙදිම චිත්‍රපටවල පසුබිම් නර්තන ශිල්පිනියක්‌ ලෙස කටයුතු කරන්න අවස්‌ථාව ලැබුණා.
ඒ අතරතුරේදී තමයි නිශාන්ත වීරසිංහ ඔහුගේ "සඳ දෙව් දෝණි" චිත්‍රපටයේ ප්‍රධාන චරිතය සඳහා මට ආරාධනා කළේ. ඒ කාළේ චිත්‍රපටයක ප්‍රධාන චරිතයකට ආරාධනා ලැබෙනවා කියන්නේ ලොකු දෙයක්‌. විශේෂයෙන්ම කවදාවත් රඟපාලා නැති කෙනකුට ඒ වගේ අවස්‌ථාවක්‌ ලැබෙනවා කියන්නේ ඉහේ මලක්‌ පිපුණා වගේ වැඩක්‌. මම ආරාධනාව බාරගෙන රඟපාන්න ආවා.
ටෙලි නාට්‍ය කරලා නැද්ද?
තියෙනවා. "කාව්‍ය" ටෙලි නාට්‍යයේ කාව්‍යාගේ යෙහෙළිය තිමානිගේ චරිතය සහ "නිලංජනා" ටෙලි නාට්‍යයේ නිලංජනා ගේ යෙහෙළිය සමන්තිගේ චරිතය. ඊටපස්‌සේ ටෙලි නාට්‍යවල රඟපෑවේ නැහැ. චිත්‍රඵටවල විතරයි රඟපෑවේ.
අමිෂා ඉගෙන ගත්ත පාසල
ජාඇල නිමල මරියා බාලිකා මහා විද්‍යාලය
අමිෂා පවුලේ තොරතුරු
අපි ඉන්නේ ජාඇල. මගේ පවුලේ ඉන්නෙ අම්මයි තාත්තයි අක්‌කයි. අක්‌කා විවාහවෙලා ඉන්නවා. එයාට දුවක්‌ ඉන්නවා.
අමිෂා විලාසිතා කරන්න කැමති කෙනෙක්‌ද?
ඔව්....කවුද අකමැති විලාසිතා කරන්න. මම සාමාන්‍යයෙන් තැනට ගැළපෙන විදිහට අඳින කෙනෙක්‌
ආදරය ගැන කතා කළොත්...
ආදරය ජීවිතයට අත්‍යවශ්‍ය දෙයක්‌. ජීවිතය තුළදි ආදරය විඳින්න ඕන කියලා මම විශ්වාස කරනවා.
විවාහය ගැන මොනවද හිතන්නේ.
තරුණ කාලේදී සමහරකුට විවාහය අත්‍යාවශ්‍ය නොවන දෙයක්‌ කියලා හිතෙන්න පුළුවන්. නමුත් වයසට යන විට දැනෙන තනිකම. පාළුව ගත් තීරණ වැරදි බවට පෙන්වා දෙන්න පුළුවන්. මගේ සිත තුළ විවාහය ගැන සුන්දර බලාපොරොත්තු තියෙනවා. තව අවුරුදු 2 කින් මම අනිවාර්යයෙන්ම විවාහ වෙනවා.
අමිෂා කටකතාවලින් සැලෙනවද?
අපෝ නැහැ. ඕනම කෙනෙකුට කටක්‌ තියෙන නිසා තවත් කෙනෙකු ගැන හොඳ හෝ නරක කටකතාවක්‌ හැදිය හැකියි. නැත්නම් පොඩි දෙයක්‌ ලොකු කරලා සමාජය පුරාම පතුරවා යවන්නත් පුළුවනි.
මට කාගේ හරි ගැන කටකතාවක්‌ කියන්න ආවොත් මම ඒක සාවදානව ඇහුම්කන්දීලා එක කණකින් අහලා අනෙක්‌ කණෙන් පිටකරලා දානවා. සාමාන්‍යයෙන් මම වැඩ කරන්නේ මට ඕන විදියටයි.
ඔයා ගැන කතාවක්‌ පැතිරුණොත්. අමිෂා මොකද කරන්නේ.....
ගණන් ගන්නේ නැහැ. මට නම් කටකතා අඩුයි. සමහරු කටකතාවක්‌ නම් හැදුවා. හැබැයි ඒ කටකතාව නම් ඇත්තක්‌.
හරින්දි ලියනගේ
ඡායා - දිනේෂ් ගමගේ
උපුටා ගැනීම දිවයින
